ANALISIS POLITICO ARUBA

Den e dianan aki por a sinti un movecion den comunidad cu a capta hopi atencion. E reflexion riba un orientacion cu e ingredientenan pa bira un causa comun nobo, pa  pueblo di Aruba por haya un perspectiva alentador atrobe riba su futuro.

Si e bon comun a sali for di inspiracion di e líder politico Mike Eman, cu su trayectoria ta uno di articula y desaroya visionan cu ta mira mas aya, pero por a ripara na amplitud di esunnan cu a participa na e 1’er Symposium riba “The Restoration of the Common Good,” cu e deseo aki ta surpasa lineanan politico.

Por a mira lidernan religioso contempla profundamente riba e nececidad pa un orientacion asina cu ta pone e interes general central den pensamento di gobierno y sociedad.

Cu Aruba por cana e caminda di Bon Comun a sali hopi cla y convincente padilanti for di e bunita ehempelnan cu Ex Promer Minister Mike Eman a duna na e symposium. Un politica etico y servicio publico semper mester ta relata na un causa husto. 

or di principio di pensamento riba politica y servicio publico a busca un cuadra di referencia etico y husto pa ta e guia y e cuadra dentro cual ta duna contenido na accionnan di politica y servicio publico. Aruba tin mester di locual a keda plantea un e symposium riba bon comun.

Pensadonan profundo desde principio di politica a pensa hopi riba e pregunta fundamental aki. Nan a bin na e conclusion cu eherce politica pa un pueblo su bienestar, su destino y futuro. mester ta relata na locual nos Creador lo desea pa humanidad: eherce esfuerzo pa bida riba tera worde realisa mas hopi posibel den imagen di Reino di Dios, unda husticia y amor prohimo ta prevalece. 

Cu e strea di guia aki e pensadonan a conecta eherce politica na e concepto di Bon Comunon  (Bonum Commune; El Buen común; Algemene Welzijn; Common Good). 

Pa tur hende e ta cla cu na momento cu pueblo ta sufriendo hustamente pasobra nan interes no ta e punto di guia mas, ni den gobierno, pero tambe den nos sociedad individualista, un yamada pa un causa comun dirigi riba e Bon Comun ta na su ora. 

E Bon Comun lo mester ta punto di orientacion, e compas moral pa tur accion politico manera un strea na shelo.

 E “Bon” ta relata cu e resultado mester ta positivo pa e ciudadano, y “Comun” ta relata cu e resultado postivo mester conta pa tur hende, henter e pueblo. 

Manera a worde contempla na e symposio e principio di Bon Comun ta dirigi su mes riba e condicionnan cu ta necesario pa un persona y comunidad por florece y por fortalece e Bon Comun.

E condicionnan aki por varia, nan por ta di diferente índole, for di condicionnan practico na un banda, manera alimentacion, paña pa bisti, trabao y empleo, entrada y por ehempel salud y educacion.

Aruba tin mester awor un politica dirigi riba e Bon Comun. E ta en berdad un strea di guia necesario pa e dirigente, pueblo, comunidad y ciudadano tin un punto di orientacion a base di cual nan por desaroya y mehora nan mes, construyendo un mundo bon y comun cu sentimiento, cu conexion, vision y futuro.

E no ta un secreto cu na e momentonan aki ta bisto cu e meta di accionnan Bon ta worde lubida y tortura pa decisionan cu ta haci mas malo cu Bon. 

Y awe e meta cu resultado positivo mester worde busca pa tur hende, pa nan ta COMUN ta worde viola y a bira cu ta pa algun so tin prosperidad.

E orientacion riba e E Bon Comun a bin na e momento cu mas nos tin mester di dje. El  a bin tambe presenta den un forma cu mustra seriedad y profundisacion cu un tema asina fundamental merece. 

Cu nos Creador ilumina tur esunnan cu pone e noble guia aki nos dilanti como un politica di speransa. 

Awe mas cu nunca en berdad nos tin e tarea pa trece bek politica y servicio publico riba e rumbo di orientacion etico y husto aki cu ta e Bon Comun.