Lider di AVP, mr. Mike Eman: BBO redobla ta empeora inflacion importa manera un vergrootglas
Lider di AVP, mr. Mike Eman:
BBO redobla ta empeora inflacion importa manera un vergrootglas
Den bishita y reunionnan di bario e lider di fraccion di AVP mr. Mike Eman ta bisa cu e ta haya confirmacion di e pobresa y di e dolor den pueblo. “Costo di bida ta subiendo den un forma alarmante. Ta obvio cu e medidanan cu Gabinete Wever Croes a implementa durante e ultimo añanan a impacta e cifra di inflacion severamente. Na 2017 ainda inflacion tabata menos cu 0%, esta – 0.6%. Na 2018 y 2019 esaki a subi drasticamente cu medidanan di Gabinete Wever Croes. Y awor den 2022 e a yega un record na Aruba. CBS ultimamente ta raporta cu bestaansminimum practicamente pa luna ta subi cu 200 a 300 florin. Entre December 2017 y September 2022 por mira un aumento dramatico manera indica riba e tabelnan aki di CBS.
REDOBLACION BBO – VERGROOTGLAS
Redoblacion di BBO na 2018/2019 y e hecho cu e BBO a wordo poni tambe riba diferente otro cosnan cu tabata exonera, manera transaccionnan bancario y seguro a crea un efecto inflatorio cu awe nos ta sinti mas cu nunca. Riba gasolin y diesel e impacto tabata dobel, 12%. Tambe e eliminacion di e descuento di 10cent pa liter di gasolin y diesel tabata tin un efecto negativo grandi”. Tur esaki segun e lider di fraccion di AVP, mr. Mike Eman ta haci Gabinete Wever Croes responsabel pa e pobresa alarmante cu tin na Aruba.
Eman ta splica cu na e momentonan aki tin un inflacion halto internacionalmente cu nos ta importa na Aruba. Locual ta haci e inflacion aki bira un monster ta e redoblacion di BBO na 2018//2019. Awe nos ta sinti e efectonan mas cu nunca. Pasobra, e ta splica, cu e inflacion importa ta pasa awor den hopi caso den tres schakel di e BBO cu tabata 3% y cu Gabinete Wever Croes a haci 6%. E impacto final ta riba 18%. Ta mir’e den e aumento dramatico di comestibles na Aruba.
PERDIDA PENOSO DI PODER DI COMPRA
E efecto di e perdida di poder di compra ta hopi penoso pa nos hogarnan, Eman ta accentua y ta mustra cu esaki tambe ta afecta e economia en general. Aki tambe e lider di AVP ta cita un parti di un rapport di Banco Central. Eman ta splica cu hopi bes e a mustra riba e hecho cu kibrando e poder di compra cu medidanan e gobierno ta kibra tambe e economia di Aruba. E ta bisa cu hopi bes institutonan cu ta conseha gobierno riba tema di reduccion di deficit no ta mira e corelacion entre poder di compra, economia y entrada di gobierno. Eman ta haye importante pa mira awor den e estudio di Banco Central un afirmacion di e importancia di poder di compra y consumo local riba economia. Eman ta cita: “Household consumption is readily recognized as one of the key drivers for economic development. More than half of Aruba’s gross domestic production (GDP) depends on the financial position and wellbeing of the households”.
AUMENTO DI BBO ATROBE
Aumento di BBO cu atrobe lo haci e tres schakel un total di 21%. E inflacion importa lo pasa bao di un vergrootglas cu lo aumenta esaki cu minimalmente 21%. Matando e poder di compra manera nos ta mira den e serie di medidanan pa bin ainda lo sigui empobrece Aruba y lo keda debilita un motor principal di nos economia cu ta e consumo di nos hogarnan cu ta depende di nan situacion financiero. E hecho cu no tin perspectiva pa mehoracion caba ta crea preocupacion y stress mental den nos hogarnan, e lider di AVP mr. Mike Eman ta bisa. Esaki tampoco ta yuda recuperacion di e factor consumo den nos economia e ta agrega mustrando riba e cifra halto den e estudio di Banco Central cu ta bisa cu nan ta preocupa cu nan finansa pa e siguiente seis lunanan aki.
Parlamentario Sevinger para aki riba e tereno grandisimo cu e ta menciona cu lider di MEP a negocia pa yuda bende pa miyones di dollar.
Parlamentario Benny Sevinger
Prome Minister a participa den benta di tereno di gobierno poa 17 miyon
Ayera mainta para riba un pida tereno di 70 mil meter cuadra na Palm Beach, Parlamentario Benny Sevinger a haci un denuncia hopi serio. El a splica cu e ta para na un tereno cu Prome Minister Evelyn Wever Croes a negocia pa bende pa un suma di entre 14 pa 17 miyon dollar, y e; a cuestiona e hecho di con ainda Ministerio Publico no a inicia e investigacion contra e lider di MEP.
Segun parlamentario Sevinger, su persona ta envolvi pa cinco aña caba den un investigacion di parti di Ministerio Publico contra di su persona, cual por wordo considera como un persecucion politico.
Na mes momento Sevinger a mustra cu ya caba el a yega di mustra e influencia cu e lider di MEP tin den Ministerio Publico pero tambe den departamento di Landsrecherche y cu ainda tin hopi mas di bisa riba e sistema hudicial y con esaki ta funciona, con nan ta persigui, pakico ta persigui nan y kende nan no ta persigui y pakico nan no ta haci esaki.
“Awe mi a bin aki ya cu ta hopi hende a reacciona despues di a scucha y lesa con Evelyn a reacciona riba loke mi persona a trece dilanti na radio, caminda entre otro el a laga publica cu como lider di MEP, e lo entrega un keho contra e parlamentario di AVP.”
Den e conferencia Sevinger a sigui splica cu e lider di MEP den un declaracion cu el a haci na cede di MEP, el a sigura cu “e lo entrega un keho contra mi persona pa motibo cu Benny ta susha su nomber, refiriendo na e hecho cu mi persona a declara cu mi a entrega keho contra su persona y mustrando tambe cu hasta mi a bay bek Ministerio Publico pa mira con a para cu e keho cu ami a entrega contra su persona.”
Segun e publicacion, Evelyn ta bisa cu e tambe a haci averiguacion si ta berdad Sevinger a entrega keho contra di dje insinuando cu awor pa motibo cu “mi ta envolvi den un investigacion, mi a dicidi di entrega un keho contra di su persona.
Aki Evelyn a mustra cu awor cu mi ta meti den investigacion, mi a entrega keho pa motibo cu lo mi tabata envolvi den bendemento di un pida tereno na 2004 pa e suma di 17 miyon dollar, tempo cu e tabata traha den sector priva como abogado. Esaki ta e mentalidad corupto di e lider di MEP, purbando na laba man pa algo cu el a haci como abogado y no gobernante, keriendo cu mester separa e cosnan aki for di otro pero caminda en realidad el a haci su mes culpabel pa bende tereno di pueblo.”
Benny Sevinger a sigui mustra cu documentonan cu el a entrega tambe na Ministerio Publico contra di e lider di MEP, ta confirma cu Evelyn a negocia benta di e pida tereno pa un proyecto di Waterpark caminda tabatin un suma di 17 miyon dollar envolvi, apesar cu e actual Prome Minister kier insinua cu ta trata di 17 miyon florin.
Parlamentario di AVP a sigui mustra cu Evelyn a mustra cu e tempo ey e tabata un consehero fiscal y cu ningun momento e tabata minister of tabatin un posicion publico.
“Aki pueblo por a mira e mentalidad corumpi di Prome Minister, caminda e ta mustra cu su participacion den un transaccion di casi 17 miyon dollar di un tereno di gobierno, ta hustifica ya cu e no tabata minister pero hecho ta keda cu ta un tereno di pueblo a wordo bendi, miyones a pasa di un famia pa otro y ningun hende sa ainda kende a ricibi e placa aki.
Awor cu cosnan ta bolter, awor cu tin pruebanan contundente, documentonan oficial di tur loke a tuma luga, pruebanan cu ta mustra riba envolvimento di compania di famia di Prome Minister, awor ta buscando forma pa e keho cu mi a entrega no wordo acepta,” Parlamentario Benny Sevinger a declara.